مفاہمت یا انتقام کی سیاست

پاکستان کی سیاست کا ایک بنیادی نقطہ مفاہمت اور انتقام کی سیاست سے جڑا ہوا ہے۔ ہم جن داخلی، علاقائی اور خارجی مسائل کا شکار ہیں یا ہمیں جن سنگین حالات کا سامنا ہے ان میں مفاہمت ہی کی سیاست کو بنیاد بنا کر ہم قومی مسائل کا حل تلاش کرسکتے ہیں۔ لیکن بدقسمتی یہ ہے کہ ہم نے ہمیشہ قومی سیاست میں قومی مفاہمت کے بجائے سیاسی انتقام یا اپنے سیاسی مخالفین کو ختم کرنے یا ان کو دیوار سے لگانے کی حکمت عملی کو اختیار کیا ہے۔ اسی بنیاد پر احتساب اور جوابدہی کے نظام کو بھی اپنے سیاسی مفادات کے لیے بطور ہتھیار استعمال کیا ہے۔ یہ ہی وجہ ہے کہ یہاں سیاست، جمہوریت، آئین ، قانون اور احتساب جیسے سارے معاملات میں بگاڑ کی کہانی نمایاں نظر آتی ہے۔ ہماری مفاہمت یا انتقام کی سیاست میں محض کردار بدلتے ہیں اور سوچ و فکر وہی پرانے خیالات پر ہی مبنی ہوتی ہے۔ ہم سیاسی مسائل کا حل سیاسی انداز میں کرنے کے بجائے غیر سیاسی انداز یا انتقام کو بنیاد بنا کر کرنے کی کوشش کرتے ہیں۔ ہمارے یہاں مفاہمت کی سیاست کبھی حقیقی معنوں میں پروان نہیں چڑھ سکی۔ 

ہم نے مفاہمت کی سیاست کے جو معنی نکالے ہیں، ان میں اسٹیبلیشمنٹ کے ساتھ معاملات کو طے کر کے آگے بڑھنا ہے۔ ہماری مفاہمت کی بنیاد سیاسی اور جمہوری سطح کا استحکام یا آئین و قانون کی بالادستی یا عوامی مفادات سمیت اداروں کی بالادستی کے سوال پر نہیں بلکہ ذاتیات پر مبنی سیاسی و معاشی مفادات کی بنیاد پر ہوتے ہیں۔ ہم مفاہمت کے سیاسی کارڈ کو بھی اپنی سیاسی حمایت میں بطور حکمت عملی کے اختیار کرتے ہیں اور اپنے مخالفین کو دیوار سے لگانے کی کوشش کرتے ہیں۔ ہمارا خیال ہوتا ہے کہ انتقام کی سیاست سے ہم اپنے سیاسی مسائل کا علاج تلاش کر سکتے ہیں یا کسی کو اہم یا غیر اہم بنا سکتے ہیں۔ حالانکہ تاریخ کا سبق دیکھیں تو نتیجہ یہ نکلتا ہے کہ انتقام کی سیاست کو بنیاد بنا کر ہم نے احتساب کے نظام کو عدم شفافیت سے دوچار کیا۔ ہمارا مقصد شفاف احتساب کرنا نہیں ہوتا بلکہ احتساب کو بنیاد بنا کر انتقام لینا ہماری سیاسی حکمت عملی کا حصہ ہے۔ پاکستان میں ہر حکومت کا دور انتقام کی سیاست کے گرد ہی گھومتا ہے۔ 

یہ ہی وجہ ہے کہ ایک عمومی رائے یہ ہی بنتی ہے کہ یہاں احتساب کے نظام میں شفافیت کم اور انتقام کی بو زیاد ہ محسوس ہوتی ہے۔ وجہ صاف ظاہر ہے کہ ہمارے سیاسی نظام میں سیاسی مخالفین کو قبول نہ کرنے کی جو روش ہے وہی سیاسی انتقام کے ماحول کو پیدا کرتی ہے۔ بھٹو کی سیاست سے بے نظیر اور بے نظیر کی سیاست سے زرداری کی سیاست، نواز شریف کی سیاست، عمران خان کی سیاست، ایم کیو ایم ، جے یو آئی کی سیاست میں سیاسی مخالفین کے خلاف شدت پسندی اور دشمنی کا پہلو نمایاں نظر آتا ہے۔ ہم مجموعی طور پر سیاسی انتقام کے کھیل میں سیاسی اندھے پن کا شکار ہو جاتے ہیں یا ہم پر سیاست کم اور دشمنی کا پہلو زیادہ نمایاں ہوتا ہے اور اس میں بہت آگے تک نکل جاتے ہیں، یوں جمہوری نظام پر سوالیہ نشان کھڑے کر دیتے ہیں۔ یہاں ایسے قوانین , پالیسیاں یا اداروں میں سیاسی بھرتیاں کر کے اپنے ایجنڈے کی تکمیل کرنا اور پورے نظام کی شفافیت کو خراب کرنا ہوتا ہے۔

ایسے میں سیاست اور جمہوریت کیسے مضبوط بنیادوں پر آگے بڑھ سکے گی، خود ایک بڑا سوالیہ نشان ہے۔ یہ سوال سب فریقین کو سوچنا چاہیے کہ اس ملک میں محازآرائی , ٹکراو یا ایک دوسرے کے ساتھ عدم اعتماد یا مل بیٹھ کر کام نہ کرنے کی پالیسی سے ہم نے کیا نتائج بطور ریاست حاصل کیے۔ کیا اس پالیسی سے ہم پیچھے نہیں چلے گئے یا اس نے ہمیں داخلی اور خارجی محاذ پر سیاسی تنہائی میں مبتلا نہیں کر دیا۔ اگر ایسا ہے تو اس کی ذمے داری کس پر عائد ہوتی ہے اور کیسے ہم اس مسئلہ سے باہر نکل سکیں گے۔ ہماری دانش یا سوچ وعمل کی فکر ہمیں مسائل کے حل کے بجائے بگاڑ کی طرف لے جارہی ہے اور ہمیں اس بات کو مجموعی طور پر کوئی احساس نہیں کہ ہم خود ہی اپنے اردگرد مسائل کو پیدا کرنے کے ذمے دار ہیں۔ کیا یہ ضروری ہے کہ ہم سیاسی یا غیر سیاسی بنیادوں پر اپنے سیاسی مخالفین کے بارے میں بے بنیاد پراپیگنڈا کریں، کیونکہ اسے ختم کیے بغیر ہم سیاسی ماحول میں موجود کشیدگی کو ختم نہیں کرسکیں گے۔ 

سیاسی جماعتوں کے غیر ضروری یا ذاتیات پر حمایت یا مخالفت کا ایجنڈا ہماری قومی سیاست کو پیچھے کی طرف دکھیل رہا ہے۔ یہ ایک اجتماعی بحران ہے اور اس کا علاج بھی اجتماعی دانش کے ساتھ تلاش کیا جانا چاہیے۔ کیونکہ اس وقت جو بھی ہمارے حالات ہیں وہ ہم سے بطور ریاست سنجیدگی کے عمل کو اختیار کرنے کی طرف توجہ دلاتے ہیں۔ سیاسی انتقا م وسیاسی کشیدگی یا سیاسی الزامات سے باہر نکلنے کے چار ہی راستے ہیں۔ اول سب کو سیاسی اختلافات یا مختلف نقطہ نظر کے باوجود ایک دوسرے کی سیاسی قبولیت کو یقینی بنانا، دوئم سیاسی جماعتوں کی سطح پر ایک ایسے سیاسی کوڈ آف کنڈکٹ کو یقینی بنانا جو سیاسی جماعتوں کی سطح پر رواداری اور ایک دوسرے کے بارے میں احترام کے پہلو کو قائم کرے۔ سیاسی جماعتیں اور دیگر سیاسی فریقین اس کوڈ آف کنڈکٹ کی کڑی نگرانی کریں اور جو بھی اس دائرہ کار سے باہر نکلتا ہے اس کو جوابدہ بنایا جائے۔ 

سوئم سیاسی جماعتوں کے داخلی نظا م کو جمہوری بنیادوں پر مضبوط بنایا جائے اور یہ سیاسی جماعتیں کسی فرد واحد کے گرد نہیں بلکہ ایک ادارہ جاتی شکل کو اختیار کرسکیں۔ چہارم قومی سیاست کو ایشوز کی بنیاد پر چلایا جائے۔ سیاسی جماعتیں اور ان کی قیادت سیاسی جماعتوں کی سطح پر اپنے سیاسی کارکنوں یا ووٹرز یا حمایت یافتہ افراد کو محض الزامات یا سیاسی دشمنی پر مبنی کھیل کا حصہ بنانے سے گریز کریں۔ کیونکہ اس کا عملا نتیجہ کمزور جمہوری نظام کی صورت میں نکلتا ہے۔ قومی سیاست کو اس وقت ایک منصفانہ اور شفاف علمی و فکری سطح کا بیانیہ درکار ہے اور اس کی تیاری کے لیے قومی سطح پر ایک بڑی مشاورتی عمل اور ایک دوسرے کے ساتھ مل بیٹھ کر اتفاق رائے کی سیاست کے خدوخال کو حتمی شکل دینی ہو گی۔

یہ کام محض ریاست یا حکمران طبقات نہیں کریں گے اور ان کے سامنے کئی طرح کی سیاسی مجبوریاں بھی ہوںگی مگر جب تک ریاست کے دیگر فریقین جن میں سول سوسائٹی اور میڈیا سمیت علمی وفکری ادارے یا نوجوان نسل ایک بڑے دباو کی عملی سیاست کو پیدا نہیں کریں گے، سسٹم کا درست سمت میں آگے بڑھنا مشکل ہو گا۔ اس لیے اب وقت آگیا ہے کہ ہم ماضی اور حال کا جذباتیت کے بجائے ٹھوس اور کھلے ذہن کے ساتھ تجزیہ کریں اور جو غلطیاں یا حکمت عملی کو ہم نے ماضی میں اختیار کیا اور جو کارگر ثابت نہیں ہو سکیں تو ان کا متبادل راستہ اختیار کرنا ہو گا۔ جو بھی لوگ ماضی اور حال کے سبق سے کچھ بھی سیکھ کر آگے بڑھنے کی کوشش کرتے ہیں وہی قوتیں یا ریاست مستقبل کے مثبت راستے بھی تلاش کر لیتے ہیں, یہ ہی قومی مفاد میں ہوتا ہے۔

سلمان عابد 

بشکریہ ایکسپریس نیوز