امریکہ چین کشیدگی اور معاشی جنگ

امریکہ اور چین کے درمیان کشیدگی میں تیزی سے اضافہ ہو رہا ہے اور اب معاشی تنازعات کے ساتھ سفارتی تنازعات بھی جنم لے رہے ہیں جس کی تازہ مثال امریکہ کا ہیوسٹن میں چینی قونصلیٹ کو جاسوسی کے الزام میں بند کرنا ہے۔ ’’نیویارک ٹائمز‘‘ کے مطابق دفاع، جدید ٹیکنالوجی، تجارت اور سفارتکاری میں امریکہ اور چین کے مابین تنازع بد سے بدتر ہوتے جارہے ہیں۔ عالمی معیشت کا 40 فیصد انحصار امریکہ اور چین پر ہے۔ چین کی سب سے بڑی مارکیٹ امریکہ اور امریکہ کی تیسری بڑی مارکیٹ چین ہے۔ دونوں ممالک کی گڈز اور سروسز کی مجموعی تجارت 656 ارب ڈالر ہے جو گزشتہ سال 760 ارب ڈالر تھی جس میں چین کی امریکہ کو ایکسپورٹ 493 ارب ڈالر ہے جو گزشتہ سال 582 ارب ڈالر تھی جبکہ امریکہ کی چین کو ایکسپورٹ 163 ارب ڈالر ہے جو گزشتہ سال 177 ارب ڈالر تھی لہٰذا اس سال چین کے حق میں تجارتی خسارہ 330 ارب ڈالر ہے جبکہ گزشتہ سال یہ 405 ارب ڈالر تھا۔ امریکہ چین تجارتی جنگ میں امریکہ نے چینی مصنوعات پر اضافی ٹیکسز اور ڈیوٹیاں عائد کی ہیں جواباً چین نے بھی امریکی مصنوعات پر ڈیوٹیاں عائد کیں جس کی وجہ سے دونوں ممالک کی تجارت میں اس سال تقریباً 104 ارب ڈالر کی کمی آئی۔

امریکہ کی سب سے بڑی ناراضی چین کی ایک بڑی موبائل کمپنی سے ہے جو فائیو جی اور آرٹیفیشل انٹیلی جنس میں دنیا بھر کی کمپنیوں کو پیچھے چھوڑ چکی ہے اور اِسی خوف سے امریکہ چین تجارتی جنگ شروع ہوئی۔ امریکہ اور اس کے اتحادیوں نے چین پر یہ کہہ کر تجارتی پابندیاں لگائیں کہ چین کی جدید ٹیکنالوجی کی وجہ سے اُن کا اہم ڈیٹا چینی کمیونسٹ پارٹی کے ہاتھ لگ سکتا ہے اور امریکہ کے بڑے اتحادی برطانیہ نے دبائو میں اُس چینی موبائل کمپنی، جس کے بارے میں امریکہ کا کہنا ہے کہ چین اسے جاسوسی کیلئے استعمال کررہا ہے، پر پابندی عائد کر دی ہے۔ امریکی وزیر خارجہ مائیک پومپیو بھارت پر زور دے رہے ہیں کہ وہ ٹیلی کمیونی کیشن اور صحت کے شعبوں میں چین پر انحصار کم کرے۔ امریکہ نے الزام لگایا ہے کہ چینی انٹیلی جنس نے کوڈ 19 ویکسین سمیت درجنوں کمپنیوں کے ملکیت کے حقوق چرانے کی سازش کی ہے لیکن دراصل یہ امریکی اسٹیبلشمنٹ کی جنگ ہے۔ اس کا تعلق ڈونلڈ ٹرمپ تک نہیں بلکہ اگر جوبائیڈن بھی صدر بنے تب بھی یہ پالیسی جاری رہے گی۔ گزشتہ دنوں چین اور ایران کے مابین طے پانے والے 400 ارب ڈالر کے چابہار معاہدے کے تحت ایران اگلے 25 برس تک چین کو سستا تیل فراہم کرے گا جس کے بدلےمیں چین ایران کے آئل، گیس اور پیٹروکیمیکل کے شعبوں کی ترقی کیلئے 280 ارب ڈالر کی سرمایہ کاری کرے گا۔ 

معاہدے کے تحت ایران کے ٹرانسپورٹ اور مینوفیکچرنگ سیکٹر کے انفرا اسٹرکچر کو اپ گریڈ کرنے کیلئے چین 120 ارب ڈالر کی سرمایہ کاری کرے گا جبکہ بارٹر نظام کے تحت ایرانی تیل کے بدلے اپنی مصنوعات اور خدمات ایران کو دے گا۔ اس معاہدے کے بعد ایران نے بھارت کو چابہار زاہدان ریلوے لائن منصوبے سے الگ کر دیا اور اب ایران بھارت کے بغیر اس منصوبے کو مکمل کرے گا۔ یاد رہے کہ 2016ء میں بھارتی وزیراعظم نریندر مودی نے تہران کے دورے پر ایرانی صدر حسن روحانی اور افغانستان کے صدر اشرف غنی کے ساتھ 400 ملین ڈالر کے سہ فریقی معاہدے پر دستخط کئے تھے جو 2022ء تک مکمل ہونا تھا جس کا بنیادی مقصد پاک چین اقتصادی راہداری منصوبے کو ناکام بنانا اور خشکی کے راستے افغانستان میں اپنا اثر و رسوخ بڑھانا تھا لیکن 4 سال گزرنے کے باوجود چابہار زاہدان ریلوے لائن منصوبے پر کوئی پیشرفت نہیں ہو سکی حالانکہ امریکہ نے اس منصوبے کو ایران پر امریکی پابندیوں سے مستثنیٰ رکھا تھا جبکہ ہم نے امریکی دبائو میں پاک ایران گیس پائپ لائن منصوبے جو ایران کی طرف سے تقریباً مکمل ہے، پر اپنے حصے کا کام روک دیا ہے۔

امریکہ کی پوری کوشش ہے کہ ایران کو معاشی طور پر کمزور کرنے کیلئے اس کی تیل کی ایکسپورٹ کو روکے۔ بھارت جو ایرانی تیل کا تیسرا بڑا خریدار تھا، نے امریکی دبائو میں آکرایران سے تیل کی خریداری بند کر دی۔ ٹرمپ انتظامیہ کی اس جارحانہ پالیسی سے ایران کی تیل کی پیداوار جو 2018ء میں 4 ملین بیرل یومیہ تھی، مارچ 2020ء میں کم ہو کر 2.5 ملین بیرل یومیہ رہ گئی ہے جس سے ایران کی معاشی گروتھ میں 3.7 فیصد کمی آئی ہے لیکن چین اور ایران کے حالیہ 25 سالہ تیل کا معاہدہ دونوں ممالک کیلئے Win,Win صورتحال ہے۔ اطلاعات کے مطابق مستقبل میں چابہار بندرگاہ چین کے بیلٹ اینڈ روڈ منصوبے کا حصہ بن جائے گی اور سی پیک پلس جس میں چین، پاکستان، روس، ترکی، ایران شامل ہیں، سی پیک کو وسط ایشیا اور یورپ سے ملا دے گا جبکہ ہائی اسپیڈ ٹرین کے ذریعے چین کو وسط ایشیا اور ترکی کے ذریعے یورپ تک رسائی حاصل ہو جائے گی اور چین، پاکستان، ایران، روس اور ترکی خطے میں امریکہ اور بھارت کے مقابلے میں ایک طاقتور بلاک بن کر ابھریں گے۔

امریکہ خطے میں چین، ایران اور روس کی حکمت عملی سے پریشان ہے جنہوں نے گزشتہ دسمبر میں خلیج اومان میں مشترکہ فوجی مشقیں کی تھیں جو خطے میں امریکی دفاع کیلئے واضح پیغام تھا۔ چین پاکستان کا نہایت قابلِ اعتماد دوست ہے جس نے ہر مشکل وقت میں پاکستان کی سفارتی، مالی اور تجارتی مدد کی ہے۔ 65 ارب ڈالر کے سی پیک منصوبوں میں چینی سرمایہ کاری مستقبل میں خطے میں گیم چینجر ثابت ہو گی۔ جنوبی ایشیا میں تیزی سے رونما ہونے والی تبدیلیوں کے پیش نظر میری سی پیک اتھارٹی کے چیئرمین لیفٹیننٹ جنرل (ر) عاصم سلیم باجوہ سے درخواست ہے کہ وہ سی پیک کے منصوبوں کو بروقت پایہ تکمیل تک پہنچائیں تاکہ چینی حکومت کا ہم پر اعتماد قائم رہے، بصورت دیگر حالات بدلنے سے نئے مواقع پیدا ہوتے ہیں اور چین کیلئے ان مواقع سے فائدہ اٹھانا آسان ہو گا۔ بھارتی اخراج اور چین ایران حالیہ معاہدہ اس کی ایک زندہ مثال ہے۔

ڈاکٹر مرزا اختیار بیگ

بشکریہ روزنامہ جنگ