سعودی عرب میں کورونا وائرس کا علاج کیسے کیا جا رہا ہے ؟

سعودی وزارت صحت کے ترجمان ڈاکٹر محمد العبد العالی نے کہا ہے کہ اینٹی بائیوٹک کورونا وائرس کا علاج نہیں ہے۔ اخبار 24 کے مطابق العبد العالی نے  ریاض میں یومیہ بریفنگ کے دوران بتایا کہ نئے کورونا وائرس کا علاج مزاحمتی نظام کو مضبوط کر کے کیا جارہا ہے۔ کورونا کے مریضوں کو جس قسم کی ادویہ دی جارہی ہیں وہ وائرس کو قابو کرنے کے لیے منتخب کی گئی ہیں۔ العبدالعالی نے اطمینان دلایا ہے کہ اینٹی بائیوٹک کورونا وائرس کا بنیادی علاج نہیں تاہم کورونا وائرس سے متاثر ہوتے ہوئے دیگر امراض میں مبتلا ہوجانے والے بعض مریضوں کو اینٹی بائیوٹک دی جارہی ہے۔

وزارت صحت کے ترجمان نے زور دے کر کہا کہ سعودی عرب میں کورونا کے مریضوں کے لیے کئی ادویہ کا مجموعہ استعمال کیا جارہا ہے جب بھی کورونا کی مخصوص دوائیں تیار ہوں گی ان سے استفادہ کیا جائے گا۔ ترجمان وزارت صحت نے یہ بھی کہا کہ جب بھی اور جہاں بھی کورونا وائرس کی ویکسین تیار ہو گی سعودی عرب اسے پہلی فرصت میں حاصل کرنے والے ممالک میں سے ایک ہو گا۔ انہوں نے مزید کہا کہ دنیا بھر میں کورونا کے علاج کے لیے ویکسین کی جدوجہد جاری ہے۔ سعودی عرب کے کئی قومی ریسرچ سینٹرز کورونا ویکسین کی تیاری سے متعلق عالمی مہم میں شریک ہیں۔

بشکریہ اردو نیوز