امریکی ٹیکنالوجیکل کمپنی ایپل نے ہیکرز کو 3 لاکھ ڈالر کیوں دیئے؟

امریکی ٹیکنالوجیکل کمپنی ایپل کے سسٹم میں 55 خامیوں کو تلاش کر لیا گیا ہے جس پر کمپنی نے ان ’رضاکارانہ ہیکرز‘ کو 3 لاکھ امریکی ڈالر ادا کیے۔ غیر ملکی میڈیا کی رپورٹ کے مطابق ایپل کے ’بَگ باؤنٹی پروگرام‘ کے تحت 5 ہیکرز پر مشتمل ایک گروپ نے ایپل کے سسٹم میں موجود خامیوں کا پتہ لگایا۔ ان ہیکرز نے تقریباً 3 ماہ کی محنت کے بعد ایپل کے سسٹم میں 55 خامیوں کو تلاش کیا جن میں 11 فوری توجہ طلب، 29 انتہائی درجہ کی، 13 درمیانے درجے کی اور 2 کم خطرناک خامیاں شامل تھیں۔ بگ باؤنٹی پروگرام کے تحت سسٹم میں خامیاں تلاش کر نے کے بعد ایپل نے ہیکرز کے اس گروپ کو 3 لاکھ امریکی ڈالر (تقریباً 4 کروڑ 91 لاکھ سے زائد پاکستانی روپے) ادا کیے۔

ان ہیکرز نے اپنے ایک بلاگ پوسٹ میں بتایا کہ ’اپنے کام کے دوران ہم نے مختلف خامیاں تلاش کیں اور یہ خامیاں کمپنی کے بنیادی ڈھانچے میں ہی موجود تھیں۔‘ انھوں نے بتایا کہ ان خامیوں کے ذریعے انٹرنیٹ پر موجود جرائم پیشہ ہیکرز حملہ کرکے کمپنی کے صارفین اور ملازمین کی اپیلیکیشنز کو اپنے قبضے میں لے سکتے ہیں، اس میں ایک وائرس چلا سکتے ہیں جو صارفین کے آئی کلاؤڈ اکاؤنٹس کا کنٹرول حاصل کر سکتے ہیں۔

بشکریہ روزنامہ جنگ