ایف اے ٹی ایف : احتیاط سے راستہ نکالیں

عالمی ادارے فنانشل ایکشن ٹاسک فورس ایف اے ٹی ایف کے پاکستان کو گرے لسٹ میں رکھنے یا اس فہرست سے نکالنے سے متعلق اجلاس کا وقت جوں جوں قریب آتا جا رہا ہے اس ادارے کی شرائط پر عملدرآمد جلد یقینی بنانے کی ضرورت بڑھتی جا رہی ہے ۔ اس باب میں درکار وقت ستمبر کے ابتدائی ہفتوں تک محدود معلوم ہوتا ہے پاکستان کی طرف سے ضروری دستاویزات و تفصیلات جمع کرانے کے بعد اکتوبر میں جو فیصلہ آئے گا اس سے پاکستان کے مفادات کے حوالے سے بہت سے امور مثبت یا منفی طور پر متاثر ہو سکتے ہیں۔ وطن عزیز اگر سفید فہرست میں آ گیا تو تجارت اور معیشت کے حوالے سے اس کیلئے کئی آسانیاں پیدا ہو جائیں گی۔ مگر خدانخواستہ اس کا نام بلیک لسٹ میں آ گیا تو وطن عزیز کیلئے بہت سے مسائل پیدا ہو سکتے ہیں۔ 

جبکہ گرے لسٹ میں رہتے ہوئے بھی وقتاً فوقتاً کئی مطالبات کا سامنا رہا ہے۔ اس باب میں اسلام آباد نے متعدد تنظیموں پر پابندی لگانے سمیت بہت سے اقدامات کئے ہیں۔ تاہم قانون سازی کے حوالے سے ’’فیٹف ‘‘ کے بعض مطالبات اس وقت بھی موجود ہیں۔ حکومت اور اپوزیشن میں شامل سیاست دانوں سمیت کوئی محب وطن پاکستانی یہ نہیں چاہے گا کہ مسائل کی دلدل میں گھرے ملک کیلئے پابندیوں کی صورت میں مزید مشکلات پیدا ہوں۔ تاہم بعض حلقوں کا یہ تاثر یکسر بے وزن قرار نہیں دیا جا سکتا کہ حکومت اور اپوزیشن کے ایک دوسرے پر الزامات اپنے اپنے حامیوں کا جوش و جذبہ قائم رکھنے اور پگڑی اونچی ہونے کا نفسیاتی تاثر قائم رکھنے کی حکمت عملی کا حصہ ہیں اس لئے امید کی جاتی ہے کہ ملکی مفاد میں بالآخر ایف اے ٹی ایف قوانین کی منظوری کی راہ نکل آئے گی مگر کیا ہی اچھا ہو کہ ایک یا دوسرے فریق کو دشمن ملک کے قریب ہونے کے طعنے دینے کے اس طریق کار سے اب اجتناب برتا جائے۔ 

جہاں تک پگڑی اونچی رکھنے یا ساکھ بڑھانے کے معاملات کا تعلق ہے وہ صرف اس طرز عمل سے بڑھتی ہے جو ملکی مفاد میں نظر آ رہا ہو۔ عالمی ادارہ ایف اے ٹی ایف منی لانڈرنگ سمیت دہشت گردی سے تعلق رکھنے والے جن امور کا نگران ہے وہ پاکستان کے مفاد میں بھی ہیں کیونکہ وطن عزیز طویل عرصے تک دہشت گردی کی صورت میں باہر سے مسلط کردہ خوفناک جنگ کا شکار رہا ہے۔ مگر اس کی مشکلات کی بڑی وجہ پڑوسی ملک بھارت کا وہ طرز عمل ہے جو ایک طرف پاکستان میں دہشت گردی کی صورت میں نظر آیا اور جس کے متعدد شواہد میں سے ایک وطن عزیز میں دہشت گردی نیٹ ورک چلانے والے بھارتی بحریہ کے حاضر سروس کمانڈر کلبھوشن یادیو کی گرفتاری ہے دوسری طرف نئی دہلی سرکار کی پوری کوشش ہے کہ پاکستان کا نام بلیک لسٹ میں ڈال دیا جائے ۔

اسلئے ماضی کی حکومتوں میں کسی نہ کسی عنوان سے شامل رہنے والی پارٹیوں پر یہ ذمہ داری زیادہ عائد ہوتی ہے کہ وہ ایف اے ٹی ایف کی ضروریات پوری کرنے کیلئے قانونی مسودوں کو زیادہ موثر بنانے میں مدد دیں اور ملک میں جاری اس احتساب کے تسلسل کو بھی یقینی بنائیں جس کا دعویٰ مختلف اوقات میں سب ہی اپنے اپنے انداز میں کرتے رہے ہیں کیونکہ غریبوں کے اکائونٹ میں آ کر ٹرانزیکشن کے ذریعے کہیں منتقل ہونے والی خطیرہ رقوم سمیت ناجائز ذرائع سے حاصل ہونے والے سرمائے کے بھی دہشت گردی کی معاونت میں استعمال ہونے کے خدشات و امکانات ظاہر کئے جاتے رہے ہیں۔ وزیر اعظم عمران خان قومی سلامتی وعوامی مفاد سے تعلق رکھنے والے ایف اے ٹی ایف قوانین ہر صورت منظور کرانے کا عزم ظاہر کر چکے ہیں اور توقع ہے کہ اس باب میں قومی اسمبلی و سینٹ کے اجلاس بلائے جائیں گے جبکہ اپوزیشن کا دعویٰ ہے کہ ایف ٹی ایف قانون پر ن لیگ اور پی پی نے ذمہ داری نبھائی ہے ضرورت اس بات کی ہے کہ سخت الفاظ کے تبادلے سے اجتناب برتتے ہوئے احتیاط و تدبر سے اس قانون سازی سمیت مشکلات سے باہر آنے کی راہ نکالی جائے۔

بشکریہ روزنامہ جنگ