افغانستان : امن کے دروازے پر

افغان حکومت اور طالبان قیادت کے درمیان قطر کے دارالحکومت دوحہ میں مستقبل کے نظام حکومت کی صورت گری کے لئے آج سے امن مذاکرات کا آغاز خطے میں امن و استحکام کے آرزو مند دنیا کے ہر امن پسند شخص کے لئے امید افزا ہے۔ آج سے ٹھیک 19 برس پہلے مبینہ طور پر اغوا کئے گئے دو طیارے امریکہ کے شہر نیویارک کے ورلڈ ٹریڈ سنٹر کی دو فلک شگاف عمارتوں سے ٹکرائے تھے۔ حیرت انگیز طور پر اس کے بعد یہ عمارتیں محض چند لمحوں میں بدترین آتش زدگی کا ہدف بن کر اس طرح زمیں بوس ہو گئی تھیں جس کی کوئی دوسری مثال شاید ہی کہیں مل سکے۔ امریکی حکومت کی طرف سے فوری طور پر اس کا ذمہ دار القاعدہ کی قیادت اور اس کی سرپرست کابل کی طالبان حکومت کو قرار دے کر اپنے نیٹو اتحادیوں کے ساتھ افغانستان پر فوج کشی کا آغاز ہوا جبکہ تحریک طالبان کی جانب سے اس کے خلاف سخت جان مزاحمت شروع ہوئی۔ 

اس کے نتیجے میں نہ صرف افغانستان کے طول و عرض میں جنگ کے شعلے بھڑک اٹھے بلکہ بوجوہ پاکستان بھی بدترین دہشت گردی کا ہدف بنا۔ تاہم صدر ٹرمپ نے 18 سال کی بےنتیجہ جنگ کے بعد اپنی افواج کو افغانستان سے واپس بلا کر اپنے ملک کو جنگ کی اس دلدل سے نکالنے کا فیصلہ کیا اور اس کے لئے طالبان قیادت سے بات چیت کا راستہ اپنایا۔ پاکستان کی سیاسی اور عسکری قیادت نے خطے میں امن کی خاطر اس عمل کو کامیاب بنانے میں ہر مرحلے پر بھرپور تعاون کیا۔ اس کے نتیجے میں ساڑھے چھ ماہ پہلے امریکہ اور طالبان کے درمیان امن معاہدہ طے پا گیا جس کے فوراً بعد افغان حکومت اور طالبان کے مابین ملک کے مستقبل کے نظام حکومت کی تشکیل کے لئے بات چیت کا سلسلہ شروع ہونا تھا مگر مختلف اسباب کی بنا پر ایسا ہو نہیں سکا‘ تاہم اللہ کا شکر ہے کہ دونوں فریق دوحہ میں مذاکرات کا آغاز کر رہے ہیں۔ 

وزیراعظم عمران خان نے بین الافغان مذاکرات کا خیر مقدم کرتے ہوئے اس حقیقت کی بالکل درست نشان دہی کی ہے کہ وہ ایک مدت سے افغان مسئلے کے فوجی کے بجائے سیاسی حل کی ضرورت واضح کرتے چلے آرہے ہیں اور امن عمل کے اس مرحلے تک پہنچنے میں پاکستان کی معاونت نے کلیدی کردار ادا کیا ہے۔ وزیر اعظم کے دفتر سے جاری کردہ بیان کے مطابق انہوں نے کہا ہے کہ آخر کار ہماری مشترکہ کوششیں رنگ لے آئیں اور وہ دن آگیا جس کا افغان عوام کو برسوں سے انتظار تھا۔ بیان میں مزید کہا گیا ہے کہ ’’پاکستان نے اپنی ذمہ داری پوری کر دی اور اب افغان قیادت پر منحصر ہے کہ وہ اس تاریخی موقع سے فائدہ اٹھائے‘ فریقین وعدے پورے کریں‘ مثبت انداز میں مل کر کام کریں اور ایک جامع اور پُرامن حل کو یقینی بنائیں‘‘ وزیراعظم نے اپنے بیان میں بجا طور پر اس امید کا اظہار کیا ہے کہ ’’فریقین اپنی ذمہ داریوں کو محسوس کرتے ہوئے تمام مسائل کے خاتمے کے لئے کردار ادا کریں گے اور افغانستان میں امن و استحکام کے مقصد کے حصول کی خواہش کو عملی جامہ پہنائیں گے‘‘۔ 

بدترین بدامنی اور خوں ریزی کے 19 برسوں کے بعد بلاشبہ افغانستان آج امن کے دروازے پر پہنچ چکا ہے اور اب یہ افغان حکومت، طالبان قیادت اور دوسرے افغان گروپوں کی مشترکہ ذمہ داری ہے کہ وہ اس موقع کو ذاتی اور گروہی مفادات سے بالاتر ہو کر اپنے وطن، اپنی قوم اور پورے خطے کے مفاد میں بہترین طور پر استعمال کریں۔ اس مقصد کے لیے ضروری ہے کہ تمام فریق افہام و تفہیم سے کام لیں‘ بےلچک موقفوں پر ڈٹے رہنے کے بجائے اختلافات کے قابلِ عمل حل تک پہنچنے کے لئے حتی الامکان اپنے رویوں میں نرمی اختیار کریں اور عشروں سے جنگ کے شعلوں میں جھلستے افغانستان اور پورے خطے میں جلد از جلد پائیدار امن واستحکام اور ترقی و خوشحالی کے ایک نئے دور کے آغاز کو یقینی بنائیں۔

بشکریہ روزنامہ جنگ