چین بھارت جھگڑا کیوں جاری رہے گا ؟

پہلی بات یہ کہ یہ جھگڑا ورثے میں ملا ہے۔ اب سے ایک سو چھ برس پہلے ( انیس سو چودہ ) جب تبت اور برٹش انڈیا کے درمیان شمال مشرقی بھارت اور جنوبی تبت کی سرحدی حد بندی کا سمجھوتہ میکموہن لائن کے نام سے ہوا توتبت چین کا حصہ نہیں تھا۔ اسی طرح چینی ترکستان ( شن جیانگ) بھی چین کا علامتی حصہ مگر اندرونی طور پر خود مختار صوبہ تھا۔ جب انیس سو انچاس میں چین میں چیانگ کائی شیک کی قوم پرست حکومت کو کیمونسٹوں نے بیجنگ سے کھدیڑ کر فارموسا (تائیوان) کے جزیرے تک محدود کر دیا اور ماؤزے تنگ نے عوامی جمہوریہ چین کے قیام کا اعلان کیا تو نئی حکومت نے تمام ’’ غیر منصفانہ عوام دشمن‘‘ بین الاقوامی سمجھوتوں کا ازسرِنو جائزہ لینے کا عندیہ دیا ۔

انیس سو پچپن میں انڈونیشیا کے قصبے بنڈونگ میں صدر احمد سوئیکارنو سمیت پانچ میزبان ایشیائی ممالک (بشمول برما، بھارت، پاکستان، سری لنکا) نے بڑی طاقتوں کی سرد جنگ سے الگ تھلگ رہنے کے خواہش مند نو آزاد ممالک کے ایک الگ گروپ کی تشکیل کے لیے اعلیٰ سطح اجلاس بلایا جس میں چواین لائی ، نہرو ، ناصر ، بن بلا اور محمد علی بوگرہ سمیت انتیس ایفرو ایشین ممالک کے رہنماؤں نے شرکت کی (بعد ازاں اس گروپ نے غیر جانبدار تحریک کی شکل اختیار کی )۔ نئے گروپ کی قیادت کے لیے چین اور بھارت دونوں ہی بہت شدت سے خواہاں تھے۔ نہرو اور چواین لائی بظاہر ایک دوسرے سے بنڈونگ میں گرم جوشی سے ملے مگر نجی طور پر چواین لائی نے رائے دی کہ میں نے اس سے زیادہ خود پسند (نہرو) شخص آج تک نہیں دیکھا۔

حالانکہ بھارت اور پاکستان کیمونسٹ چین کی حکومت تسلیم کرنے والے اولین ممالک میں شامل تھے۔ مگر ابتدائی عشرے میں عوامی جمہوریہ چین سیٹو اور سینٹو جیسے فوجی معاہدوں میں شمولیت کے سبب پاکستان کو مغرب کے طفیلیے کے طور پر شبے سے دیکھتا رہا۔ جب کہ نہرو کے ساتھ چینی قیادت کی نسبتاً آسانی سے نبھتی رہی کیونکہ برصغیر کی آزادی کی تحریک میں نہرو کے کردار اور سوشلسٹ نظریات کے سبب چینی اور روسی کامریڈ نہرو کو اعتماد کا آدمی سمجھتے تھے۔ پہلی چین بھارت علاقائی دراڑ تب پڑی جب انیس سو انسٹھ میں بھارت نے ساڑھے تین ہزار کلو میٹر کی ہمالیائی سرحدی حد بندی کے نقشے شایع کیے جس میں تبت کے کئی علاقوں کو بھارت کا حصہ دکھایا گیا۔ 

کشمیر سے متصل اڑتیس ہزار مربع کلومیٹر پر پھیلا ہوا اکسائی چن ، مشرقی لداخ کے کچھ علاقے اور جنوبی تبت سے متصل بھارت کے زیرِ قبضہ ارونا چل پردیش کے نوے ہزار کلو میٹر کے رقبے پر چین کا تاریخی دعوی تھا۔ جب بھارت نے یکطرفہ سرحدی نقشے شایع کیے تو چین نے پہلی بار واضح طور پر کہا کہ وہ انیس سو چودہ کی برٹش انڈیا اور تبت کے مابین کھینچی گئی میکموہن لائن سمیت کسی سرحدی حد بندی کو تسلیم نہیں کرتا جب تک کہ نئی حد بندی کے لیے باضابطہ بات چیت کا عمل شروع نہیں ہوتا۔ بھارت نے اس چینی موقف کو مسترد کر دیا۔ یوں سرد مہری بڑھتے بڑھتے دونوں ممالک کو تین برس بعد (انیس سو باسٹھ) ایک بھرپور جنگ کے دہانے تک لے آئی۔

اس سے پہلے کہ ہم باسٹھ کے سال میں داخل ہوں۔ یہ کھوجنے میں کیا حرج ہے کہ اپریل انیس سو پچاس میں بھارت کی جانب سے عوامی جمہوریہ چین کو تسلیم کرنے کے باوجود دونوں ممالک کے تعلقات ہندی چینی بھائی بھائی کے پائیدان سے صرف دس برس میں ہی جنگ آمد کے قدمچے تک کیسے گر گئے ؟ انیسویں صدی میں رنجیت سنگھ کی افواج نے کشمیر سے بھی آگے بڑھ کے لداخ سمیت تبت کے ایک بڑے حصے پر مختصر عرصے میں قبضہ کر لیا۔ بعد ازاں انگریزوں کی کوششوں سے تبت کی خود مختار حکومت اور جموں کے ڈوگروں کے مابین امن اور علاقائی تبادلے کا سمجھوتہ ہو گیا۔ مگر لداخ تبت کو واپس نہیں کیا گیا۔ 

چنانچہ جب اکتوبر انیس سو اڑتالیس میں کشمیر کے مہاراجہ ہری سنگھ نے ریاست جموں و کشمیر کے بھارت سے الحاق کی دستاویز پر دستخط کیے تو مہاراجہ کو اس دستاویز میں ریاست جموں و کشمیر کے ’ نریش‘ اور تبت کے ’دیش ادھی پتی‘ کے طور پر مخاطب کیا گیا۔ تب سے اب تک بھارت کا مسلسل موقف ہے کہ سابق ریاست جموں و کشمیر کے وہ تمام علاقے جو چھبیس اکتوبر انیس سو اڑتالیس کے دن تک ریاست کا حصہ تھے بھارت سے الحاق کے بعد اس کی ملکیت میں آ گئے۔ ان میں پاکستان کے زیرِ انتظام کشمیر ، گلگت بلتستان، چین کے زیرِ قبضہ آکسائی چن بھی شامل ہے۔ مگر عجیب بات ہے کہ اسی دستاویز الحاق میں مہاراجہ ہری سنگھ کی تبت کی ملکیت کی دعویداری کا آج تک کسی بھارتی حکمران نے بھولے سے بھی تذکرہ نہیں کیا۔ 

بلکہ نہرو نے تو ریاست کے بھارت سے الحاق کے دو برس بعد عوامی جمہوریہ چین کو کھل کے یقین دہانی کروائی کہ تبت پر بھارت کا کوئی سیاسی و جغرافیائی دعوی نہیں۔ البتہ جب انیس سو انسٹھ میں انھی پنڈت نہرو کے ہوتے بھارت نے سرحدی نقشے شایع کیے تو تبت کے کئی سرحدی علاقے بھی بھارت کا حصہ دکھائے گئے۔ ویسے دنیا کا ایسا کون سا ملک ہے جس کا کسی دوسرے ملک سے سرحدی تنازعہ نہ ہو۔ تو پھر ایسا کیا ہوا کہ چین اور بھارت کا یہ پرانا سرحدی جھگڑا آناً فانا نومبر انیس سو باسٹھ میں دس ہفتے کی ایک بھرپور لڑائی میں بدل گیا اور اس نے مستقبل کی علاقائی سیاست و اتحادی نظام کی شکل بدل کے رکھ دی۔

اس جنگ کی بنیادی وجہ چین اور بھارت کی ایک دوسرے کے علاقوں پر دعویداری نہیں بلکہ بھارت کا دہرا سیاسی رویہ تھا۔ چین نے اگرچہ سن پچاس میں تبت میں دلائی لامہ کی حکومت کو چین کے ایک خودمختار علاقے کی انتظامیہ کے طور پر تسلیم کر لیا تھا۔ مگر اس دوران یہ اطلاعات بھی آتی رہیں کہ بھارت نے ہمالیہ میں امریکی سی آئی اے کو کچھ خفیہ مواصلاتی چوکیاں قائم کرنے کی اجازت دے دی ہے تاکہ تبت اور شنجیانگ کے علاقے میں چینی نقل و حرکت پر مسلسل نگاہ رکھی جا سکے۔ چین کو یہ مبینہ ثبوت بھی ملے کہ سی آئی اے بھارتی خفیہ اداروں کی مدد سے تبت کے دارلحکومت لہاسہ میں چین مخالف جذبات ابھارنے اور تبت کو ایک آزاد و خود مختار ملک میں تبدیل کروانے کے لیے دلائی لامہ کی مدد کر رہی ہے۔

اب یہ حقیقت تھی کہ چین کا وہم ہم کچھ نہیں کہہ سکتے۔ مگر ہوا یوں کہ اس کے سبب تبت کی رہی سہی خود مختاری بھی ختم ہو گئی اور اسے چین کا باقاعدہ صوبہ قرار دے دیا گیا۔ دلائی لامہ سے انتظامی اختیارات واپس لے لیے گئے اور انھیں محض ایک علامتی روحانی درجے تک محدود کر دیا گیا۔ پھر انیس سو انسٹھ کے ایک روز اطلاع ملی کہ دلائی لامہ اپنے سیکڑوں حامیوں کے ہمراہ پاپیادہ فرار ہو کر بھارت پہنچ گئے۔ حکومتِ بھارت نے انھیں ہماچل پردیش میں دھرم شالہ کے مقام پر ایک بڑی جگہ فراہم کر دی۔ وہاں تبت کی جلاوطن حکومت کا ہیڈ کوارٹر قائم کیا گیا جو آج تک قائم ہے۔ دو ہزار نو میں خاکسار کو دلائی لامہ سے نصف گھنٹے کی ملاقات کا شرف حاصل ہوا۔ بہت سے سوالات میں ایک یہ بھی تھا کہ کیا واقعی ان کا پچاس کی دہائی میں سی آئی اے سے رابطہ تھا۔

اس کا سیدھا جواب دینے کے بجائے دلائی لامہ نے قہقہہ لگاتے ہوئے کہا کہ جب اتنے برس گذرنے کے بعد میں چینیوں کو یقین نہیں دلا سکا کہ اگر کوئی ایجنٹ ہوں گے بھی تو میرے علم میں نہیں تھے۔ تو آپ بھی اپنی سمجھ کے مطابق اس سوال کا جواب خود ہی دے لیں۔ میں تو جواب دیتے دیتے تھک گیا ہوں۔ بھارت میں تبت کی جلاوطن حکومت کے قیام کا مطلب چینی بھینسے کو لال رومال دکھانا تھا۔ چنانچہ دونوں ممالک کے مابین کسی بھی جامع جغرافیائی سمجھوتے کی رہی سہی امید بھی ختم ہو گئی۔ اسی دوران چین اور سوویت یونین کی نظریاتی دوستی میں بھی دراڑ پڑ گئی۔ بھارت نے غیر جانبدار رہنے کے بجائے سوویت یونین سے اسٹرٹیجک تعاون بڑھا نے کا فیصلہ کیا اور یوں چین اور بھارت کے مابین مستقبل کے تعلقات کا ٹیڑھا سانچہ تیار ہو گیا۔ اور پھر ایک روز نومبر انیس سو باسٹھ میں معلوم ہوا کہ چین نے بھارت پر حملہ کر دیا۔ اس کے بعد کیا ہوا۔  

اونچے پائیدان پر براجمان رہنماؤں کا ایک بنیادی المیہ یہ بھی ہوتا ہے کہ انھیں ہمیشہ وقت کی کمی کا وہم رہتا ہے لہذا وہ عجلت میں بڑے بڑے کام انجام دینا چاہتے ہیں۔ چنانچہ ٹھوکر لگنے اور منہ سے بڑا نوالہ ٹھونس لینے کا امکان بڑھتا جاتا ہے۔ دوم یہ کہ عجلت پسند رہنما اوپر یا آگے تو دیکھ لیتے ہیں البتہ عقب یا پاؤں تلے دیکھنے کی فرصت نہیں ہوتی۔ جواہر لال نہرو کے ساتھ بھی یہی المیہ تھا۔ ایفرو ایشیائی قائد بننے کے شوق میں وہ بھول گئے کہ پہلے محلے والوں سے خود کو منوا لیں تب آگے بڑھیں۔ نہرو نے خود کو محلے میں منوانے کی کوشش تو کی مگر اتفاقِ رائے کے بجائے زور زبردستی کے ذریعے۔ یعنی بین الاقوامی تاریخ کے عالم ہوتے ہوئے بھی اس علم کا خود پر انطباق نہ سیکھ پائے۔( بھٹو کا بھی شاید یہی المیہ تھا)۔

انیس سو باسٹھ کی چین بھارت جنگ سے چودہ برس پہلے نہرو نے کشمیر کے الحاق میں زور زبردستی کے ذریعے علاقائی ہیت کو اپنی مرضی سے بدلنے کی کوشش کی حالانکہ بطور مورخ انھیں علم ہونا چاہیے تھا کہ تاریخ سے زور زبردستی کسی قابلِ علاج جغرافیائی زخم کو بھی ناسور بنا دیتی ہے۔ پھر نہرو جی نے اپنے تئیں اندازہ لگایا کہ چین کیمونسٹ انقلاب کے بعد اندرونی اتھل پتھل کا شکار ہے اور پرانے اداروں کی شکست و ریخت کے بعد نئے ادارے بنانے اور مستحکم ہونے میں ابھی خاصا وقت درکار ہے۔ نیز چین کی پیپلز لبریشن آرمی نہ صرف ڈھائی عشروں سے قوم پرستوں سے لڑ لڑ کر پیشہ ورانہ تھکن کا شکار ہو چکی ہے بلکہ اس کا اسلحہ خانہ بھی بھارت کو ورثے میں ملنے والے جدید نوآبادیاتی اسلحہ خانے کے مقابلے میں کہیں کمزور ہے۔

بھارتی فوج کو دو عالمی جنگوں میں بھانت بھانت کے بین الاقوامی محاذوں پر لڑائی کا بیش بہا تجربہ بھی ہے لہذا یہی موقع ہے کہ چین کے اپنے پاؤں پر اٹھ کھڑے ہونے سے پہلے پہلے جارحانہ فارورڈ پالیسی کے تحت نئی فوجی چوکیاں تعمیر کر کے سرحدی حد بندی کو ہمیشہ کے لیے اپنے حق میں کر لیا جائے۔
بھارتی خفیہ اداروں کی بھی یہی رپورٹ تھی کہ چین فی الحال طاقت کے بھرپور استعمال کی سکت نہیں رکھتا۔ لداخ میں رہے ایک جنرل نے رائے دی کہ چینی ہمارے سامنے نہیں ٹھہر سکتے۔ ہم ایک راؤنڈ فائر کرتے تھے تو وہ غائب ہو جاتے تھے۔ صرف ایک الگ آواز ویسٹرن کمانڈ کے سربراہ لیفٹننٹ جنرل دولت سنگھ کی تھی۔

ان کا کہنا تھا کہ ہمارے دستے پوری ساڑھے تین ہزار کلو میٹر کی ہمالیائی سرحد پر بکھرے پڑے ہیں۔ جب کہ سرحد پار چینوں کا کیل کانٹے سے لیس پندرہ ہزار فوجیوں پر مشتمل ایک پورا ڈویژن پیش قدمی کے لیے تیار کیا جا رہا ہے۔ ہمیں کم ازکم چار اضافی پہاڑی بریگیڈز کی ضرورت ہے اور اس کے لیے وقت درکار ہے۔
مگر اکثریت نے کہا کہ چین صرف ایک مسلح ڈویڑن کے بل پر کوئی بڑی حماقت نہیں کرے گا۔ اور اب تو سوویت یونین بھی اس کے ساتھ نہیں جو جنگ کی صورت میں اسے رسد بھیجتا رہے۔ لہذا بھگوان کا نام لے کر شروع کرو۔ یوں بھارت نے لداخ سے آسام تک فارورڈ پالیسی کے تحت یکطرفہ سرحدی حد بندی اور فارورڈ چوکیوں کی تعمیر شروع کر دی۔ حسبِ توقع فریقین کے درمیان ہلکی پھلکی مسلح چھیڑ چھاڑ معمول ہوتی گئی۔

مگر بھارت کے علم میں شائد یہ نہیں تھا کہ چین سو سنار کی ایک لوہار کی، کی فوجی حکمتِ عملی کا سرپرائز بھی دے سکتا ہے۔ حملے سے ایک ہفتے قبل ماؤزے تنگ نے سینٹرل ملٹری کمیشن کے اجلاس سے خطاب کرتے ہوئے اپنی روائتی بذلہ سنجی کو برقرار رکھا ’’ اب جب کہ نہرو نے سینگ پھنسا لیے ہیں اور ہمیں لڑنے پر مجبور کر ہی دیا ہے تو مروت کا تقاضا بھی یہی ہے کہ ہم ترکی بہ ترکی جواب دیں تاکہ نہرو کی دل شکنی نہ ہو‘‘۔ اور پھر بیس اکتوبر انیس سو باسٹھ کو چین نے دو محاذ کھول دیے۔ ایک شمال مشرق میں آسام کی جانب اور دوسرا وسط میں لداخ کی جانب۔ بیس سے پچاس کلو میٹر تک تیزی سے پیش قدمی کی۔ آسام کی سرحد کے اندر تینتالیس کلومیٹر پرے تیز پور قصبے پر قبضہ کر لیا۔ اس کے بعد شمال مشرقی بھارت کا سارا میدانی علاقہ کھلا تھا مگر چینی رک گئے۔

اسی طرح لداخ کے محاذ پر ڈیمچوک کے علاقے پر بھی چین نے قبضہ کر لیا اور کشمیر و شن جیانگ کے درمیان واقع اقصائے چن پر قبضہ مزید پکا کر لیا۔ اکیس نومبر کو چین نے یکطرفہ جنگ بندی کا اعلان کرتے ہوئے اپنی فوجیں رضاکارانہ طور پر بیس کلو میٹر پیچھے تک ہٹا لیں اور بھارت کو پیش کش کی کہ وہ بھی فوجیں پیچھے ہٹا کر باضابطہ سرحدی حد بندی کے لیے بات چیت شروع کرے۔ اس ایک ماہ کی لڑائی میں چین کے سات سو بائیس جوان کام آئے اور ایک ہزار بیالیس زخمی ہوئے۔ بھارت کے تیرہ سو سینتیس فوجی جان سے گئے اور ایک ہزار چالیس زخمی ہوئے ، سولہ سو چھیانوے بھارتی فوجی لاپتہ ہو گئے اور لگ بھگ چار ہزار قیدی بن گئے۔

اس جنگ نے خطے پر جو دورس اثرات مرتب کیے وہ آج تک غالب ہیں۔ پہلی بار بھارت کو اندازہ ہوا کہ اونٹ پہاڑ تلے بھی آ سکتا ہے۔ پہلی بار چین کو اندازہ ہوا کہ اندرونی ٹوٹ پھوٹ کے باوجود اس کے اندر ایک بڑی طاقت بننے کا کس بل باقی ہے۔ چین نے بین الاقوامی اسٹیج پر آمدِ نو کا اعلان اکتوبر انیس سو چونسٹھ میں پہلے ایٹمی دھماکے سے کیا۔ بھارت اس ایٹمی منزل سے ابھی دس برس پیچھے تھا۔ چین کا یہ ایٹمی دھماکہ مغرب کو خبردار کرنے سے زیادہ سوویت یونین کو کرارا جواب تھا جس نے عین اس وقت چین کا ساتھ چھوڑا جب چین عالمی طور پر تنہا اور عسکری ٹیکنالوجی کے میدان میں پسماندہ تھا۔ باسٹھ کی چین بھارت لڑائی کے سبب پاکستان کو پہلی اور آخری بار قدرت نے موقع دیا کہ جب بھارت نے وادیِ کشمیر سے اپنا واحد ماؤنٹین ڈویژن لداخ کی سرحد پر منتقل کیا تو پاکستان دوسرا محاذ کھول کر جنگ بندی لائن پار کر کے جموں و سری نگر پر قبضہ کر لے۔

جب چینی سفیر نے ایوب خان کے سامنے یہ آئیڈیا رکھا تو سادہ دل ایوب خان نے اسے اپنے پیٹ میں رکھنے کے بجائے امریکا اور برطانیہ کے سفارت کاروں سے فوراً بانٹ لیا۔ بات واشنگٹن اور لندن تک پہنچ گئی اور ایوب خِان کو فوری طور اعلی ترین سطح پر یقین دہانی کرائی گئی کہ اگر اس وقت پاکستان غیر جانبدار رہے تو جنگ کے بعد ہم کشمیر کا تنازعہ حل کرانے کے لیے ایڑی چوٹی کا زور لگا دیں گے۔ معصوم ایوب خان مان گئے اور پرامید تماشائی بن کے رہ گئے۔ اور جب حسبِ فطرت مغربی ممالک وعدے سے پھر گئے تو تین برس بعد ایوب خان نے اپنے تئیں طارق بن زیاد بن کر کشمیر آزاد کرانے کی ٹھانی۔ تب تک بھارت چین سے لڑائی کے زخم چاٹ چکا تھا اور چینی بدمعاشی کے مقابلے کا واویلا مچا مچا کر جدید امریکی و برطانوی اسلحے کی مدد سے چار نئے ڈویژن کھڑے کر چکا تھا۔

بھارت کو چین کے مقابلے میں اٹھا رکھنے کے لیے نہ صرف امریکا اور برطانیہ کی بھرپور فوجی، اقتصادی و سفارتی امداد ملی بلکہ چین کے نظریاتی دشمن سوویت یونین نے بھی مگ لڑاکا طیاروں کی پہلی کھیپ دان کر دی اور یوں بھارت سوویت اسٹریٹیجک پارٹنر شپ کی طویل اننگز شروع ہوئی۔ دوسری جانب جب پاکستان نے پینسٹھ کی یکطرفہ مہم جوئی کے دوران یہاں وہاں دیکھا تو سیٹو اور سینٹو کے پیارے اتحادی، اور انیس سو انسٹھ کے فوجی معاہدے کا فریق امریکا چمپت ہو گئے۔ بلکہ امریکا اور برطانیہ نے تو کمال انصاف سے کام لیتے ہوئے بھارت اور پاکستان کو اسلحے کی فروخت پر ہی عارضی پابندی لگا دی کیونکہ لڑائی بھڑائی اچھی بات نہیں ہوتی۔ اب پاکستان کے سامنے بس ایک چین ہی کھڑا تھا کہ جس کے کندھے پر پاکستان اپنا سر رکھ سکے۔ یوں ایک تاریخی بندھن کی تاریخ شروع ہوئی۔

اپنے اپنے بے وفاؤں نے ہمیں یکجا کیا
ورنہ میں تیرا نہیں تھا اور تو میرا نہ تھا (فراز)

ویسے تو یہ فیصلہ باسٹھ کی جنگ تن تنہا لڑنے والے ایک بڑے ملک ( چین ) اور پینسٹھ کی جنگ کے موقع پر اپنے ہی دوستوں کے وعدوں کے مارے چھوٹے ملک ( پاکستان ) کے باہمی حالات نے ہی کر دیا تھا کہ اگلے زمانے میں ’’ جے اور ویرو ‘‘ ایک دوسرے کے لیے کیا کیا کر سکتے ہیں۔ مگر اس دوستی کی بنیاد وزیرِ اعظم محمد علی بوگرہ کی انیس سو پچپن میں بنڈونگ کانفرنس میں چواین لائی سے خوشگوار ملاقات ، حسین شہید سہروردی کے انیس سو چھپن کے دورہِ بیجنگ ، میجر جنرل این ایم رضا کی فعال سفارت کاری اور پھر انیس سو اٹھاون کی پہلی مارشل لا کابینہ میں شامل انتیس سالہ وزیرِ قدرتی وسائل ذوالفقار علی بھٹو نے اپنے اپنے انداز میں مضبوط کی۔ گزشتہ مضامین میں تذکرہ ہو چکا ہے کہ پچاس کی دہائی میں جب پاکستان سیٹو ، سینٹو ، پشاور کے سی آئی اے جاسوسی اڈے اور انیس سو انسٹھ کے پاک امریکا دفاعی معاہدے کی زنجیروں میں خود کو رضاکارانہ طور پر جکڑ چکا تھا تو چین کے نزدیک تصورِ پاکستان یہ تھا کہ مغربی سامراج کی کٹھ پتلی ریاست جو چین کے گھیراؤ کی زنجیر میں محض ایک کڑی ہے۔

مگر جب سرحدی حد بندی اور دلائی لامہ کے مسئلے کو لے کر چین اور بھارت بالکل ہی ایک دوسرے کے آمنے سامنے آ گئے تو پاکستان نے شاید پہلی اور اب تک کا آخری موقع استعمال کیا کہ دو بڑے ممالک کی دشمنی کو اپنے اسٹرٹیجک و جغرافیائی مفادات کے لیے چابکدستی سے کیسے استعمال کیا جا سکتا ہے۔
پاکستان کی جانب سے اس نوعیت کا پہلا مثبت اشارہ چین کی بدظن قیادت کو انیس سو اکسٹھ میں سلامتی کونسل کے اجلاس میں ملا۔ جب پاکستانی مندوب ذوالفقار علی بھٹو نے عوامی جمہوریہ چین کی اقوامِ متحدہ کی رکنیت کے بارے میں پیش ہونے والی قرار داد کی مخالفت کرنے کے بجائے رائے شماری سے غیر حاضر رہنے کا فیصلہ کیا۔ اگرچہ یہ قرار داد امریکی ویٹو کے سبب منظور نہ ہو سکی مگر امریکی پاکستان کے اس بدلے ہوئے سفارتی رویے پر خاصے جز بز ہوئے۔مگر پاکستان نے بیجنگ کو اپنی نیت کے بارے میں جو اشارہ دینا تھا وہ کامیابی سے دے دیا۔

اسی دوران میں چین نے پاکستان اور کشمیر سے ملنے والی سرحد کے کچھ مقامی نقشے شائع کیے جن میں کچھ ایسے علاقے بھی دکھائے گئے جن پر پاکستان کا بھی دعویٰ تھا۔ ایوب حکومت نے کھلا احتجاج کرنے کے بجائے خاموشی سے چینی قیادت کو اپنی دعویداری سے آگاہ کیا۔ چین نے سرحدی حد بندی کے مذاکرات پر آمادگی ظاہر کر دی۔ بھارت سے چین کی ایک بھرپور جنگ کے بعد پاکستان کے حق میں جو سازگار حالات بن گئے تھے اس فضا میں دو مارچ انیس سو تریسٹھ کو سمجھوتے پر دستخط ہوئے۔ اس کے تحت ساڑھے سات سو مربع میل علاقے کے بیشتر حصے پر چین نے پاکستانی دعویٰ تسلیم کر لیا۔ اس دعویٰ میں ہنزہ کے علاوہ متنازعہ کشمیر کا علاقہ بھی شامل تھا چنانچہ بھارت نے پاک چین سرحدی سمجھوتے کو تسلیم کرنے سے انکار کر دیا۔ مگر اس سمجھوتے کا ایک تاریخی فائدہ یہ ہوا کہ اب کشمیر کے تنازعے میں تین کے بجائے چار فریق ہو گئے۔

انیس سو اڑسٹھ میں شاہراہ ِ ریشم کی تعمیر کے منصوبے کے آغاز نے چین کو پکا پکا فریق بنا دیا اور گزشتہ برس پانچ اگست کو بھارت نے کشمیر اور لداخ کی جغرافیائی حیثیت کو جس طرح یکطرفہ طور پر بدلنے کی کوشش کی اور وزیرِ داخلہ امیت شا نے چین کے زیرِ قبضہ کشمیری علاقے آکسائی چن کو آزاد کرانے کا جو کھلا چینلج دیا۔ اس کے نتیجے میں آج لداخ میں بھارت کو چین کے بھرپور ردِعمل کا سامنا ہے اور بھارت کی سمجھ میں نہیں آ رہا کہ کرے تو کیا کرے۔ اس لحاظ سے انیس سو تریسٹھ کا پاک چین سرحدی سمجھوتہ وقت گذرنے کے ساتھ ساتھ کشمیر کی سیاسی و جغرافیائی ہیئت کے تعلق سے مسلسل ’’ گیم چینجر ‘‘ ثابت ہو رہا ہے۔ پاکستان اور چین نے تو اپنی حد بندی طے کر لی، مگر بھارت اور چین کے مابین کشمیر ، لداخ ، ہماچل پردیش ، اتراکھنڈ ، سکم ، ارونا چل پردیش سے آسام تک ساڑھے تین ہزار کلو میٹر کی لائن آف ایکچوئل کنٹرول کی کوئی حد بندی نہیں۔ چنانچہ جس کا جہاں زور چلتا ہے کچھ عرصے بعد اپنی موجودگی کا احساس دلانے کی کوشش کرتا ہے۔ گویا یہ پوری لکیر ایک دکھتا ہوا پھوڑا ہے جو جگہ جگہ سے کسی بھی وقت پھٹ پڑتا ہے۔

جیسے ستمبر اکتوبر انیس سو سڑسٹھ میں ارونا چل کے علاقے میں نتھو لا اور چولا پہاڑی دروں میں بھارت نے باڑھ لگانے کی کوشش کی تو دونوں ممالک کے مابین بھرپور تصادم ہوا۔ اس بار انیس سو باسٹھ کی نسبت بھارت کا پلہ بھاری رہا۔چین کے لگ بھگ تین سو چھیالیس اور بھارت کے اٹھاسی فوجی مہینے بھر کی جھڑپوں میں کام آئے۔ آٹھ برس بعد ( انیس سو پچھتر ) اسی علاقے میں چین اور بھارتی آسام رائفلزّ میں جھڑپ کے دوران چار بھارتی فوجی ہلاک ہو گئے۔ انسی سو اٹہتر میں وزیرِ خارجہ اٹل بہاری واجپائی پہلے اعلیٰ ہندوستانی عہدیدار تھے جنہوں نے چین کا انیس سو باسٹھ کی جنگ کے بعد دورہ کیا۔ اس کے اگلے برس دونوں ممالک نے ستائیس برس کے وقفے سے سفارتی تعلقات بحال کیے۔

مگر ان ڈھائی دہائیوں میں پل کے نیچے سے بہت سا پانی بہہ چکا تھا۔ انیس سو اکہتر میں مشرقی پاکستان کی علیحدگی کے بعد چین نے پاکستان کی خواہش پر جوہری تعاون بڑھا دیا۔ انیس سو چوہتر میں بھارت نے چین کے جوہری طاقت بننے کے دس برس بعد پہلا ایٹمی تجربہ کیا۔ چین نے پاکستان کو مشترکہ اسلحہ سازی کے مواقعے اور میزائل ٹیکنالوجی دینے پر آمادگی ظاہر کی۔ اگلے دس برس میں ( انیس سو چوراسی تک ) پاکستان ایک غیر اعلانیہ جوہری طاقت بن چکا تھا۔ امریکا اور بھارت سمیت متعلقہ ممالک کے علم میں بھی یہ بات پوری طرح سے آ چکی تھی۔ لہٰذا تب سے آج تک سوائے کارگل کے واقعہ کے بھارت اور پاکستان کے مابین گلابی جھڑپیں تو ہوتی رہیں مگر میرا ذاتی خیال ہے کہ سہ طرفہ علاقائی جوہری توازن اور سپر پاوریت کے راستے پر چین کے تیز رفتار سفر نے کسی بھی بھرپور مقامی جنگ کے امکانات کو پہلے سے کم کر دیا ہے۔ کیونکہ اس بار واقعی سب جانتے ہیں کہ آغاز کے بعد خاتمے کا فیصلہ کسی بھی ملک کے بس سے باہر ہو گا۔

شاید اسی لیے جب بھارت نے انیس سو چھیاسی میں ارونا چل پردیش کو باقاعدہ ریاست کا درجہ دینے کا اعلان کیا تو چین نے بھرپور احتجاج ضرور کیا اور پوری ریاست پر اپنا دعویٰ ضرور جتایا البتہ کوئی براہ راست فوجی اقدام کرنے یا شمشیر ہوا میں لہرانے سے گریز کیا۔ بھارت کو اگر سرحدی علاقوں میں چین کے ہم پلہ ہونا ہے تو اسے فوجی نقل و حرکت تیز رفتار بنانے کے وسائل کو مسلسل ترقی دینا ہو گی۔ مودی حکومت کا منصوبہ ہے کہ دو ہزار بائیس تک بھارت چین سرحد پر کم ازکم تین ہزار آٹھ سو بارہ کلو میٹر طویل سڑکیں تعمیر کی جائیں تاکہ ضروت پڑنے پر فوجی نقل و حرکت ہفتوں کے بجائے دنوں اور گھنٹوں میں ہو سکے۔ ساتھ ہی ساتھ بھارت لداخ سے ارونا چل تک لگ بھگ بیس فضائی پٹیوں کو بھی ترقی دینا چاہتا ہے تاکہ بھاری مال بردار طیارے اتر سکیں۔ سابق بھارتی سپاہ سالار جنرل بکرم سنگھ کہتے ہیں کہ چین نے پچھلے تیس برس میں سرحد کے دوسری جانب ذرائع نقل و حمل کو اتنی ترقی دے لی ہے کہ اب وہ زمینی و فضائی راستے سے ایک ہفتے کے اندر اندر بتیس ڈویژن تک فوجی قوت ہنگامی طور پر سرحد تک پہنچا سکتا ہے۔ جب کہ بھارت کو کم ازکم بائیس ڈویژن فوج کی تیز رفتار نقل و حرکت کی صلاحیت پیدا کرنا ہو گی۔

فی الحال تو بھارت کی صلاحیت کا یہ حال ہے کہ دو ہفتے قبل لداخ کی گلوان ویلی میں جس جھڑپ کے دوران بیس بھارتی فوجی ہلاک اور چھہتر زخمی ہوئے۔ انھیں پیچھے لے جانے میں ہی بھارت کو بارہ گھنٹے لگ گئے۔ اگر بھارت کے پاس برق رفتار مواصلاتی صلاحیت ہوتی تو کئی جانیں بچائی جا سکتی تھی۔ اس ہاؤ ہو سے فائدہ اٹھا کر چین نے وادی گلوان میں پیچھے ہٹنے کے بجائے بھارت سے پیچھے ہٹنے کا مطالبہ کر دیا ہے اور اس علاقے میں اپنی فوجی موجودگی میں مسلسل اضافہ کر رہا ہے تاکہ اس علاقے تک سڑک پہنچانے کے منصوبے کو روکا جا سکے اور قریب ہی موجود بھارتی فضائی پٹی بھی نشانے پر رہے۔ تین برس قبل سکم اور تبت کے مابین دوکلام میں بھی سڑک کی تعمیر کے مسئلے پر دونوں ممالک تہتر دن تک ایک دوسرے کی آنکھوں میں آنکھیں ڈالے کھڑے رہے۔ یعنی اس وقت دونوں ممالک کی پوری کوشش ہے کہ ایک دوسرے کو سرحدی مواصلاتی رسائی بہتر بنانے سے روکیں۔

یہی مواصلاتی رسائی بہتر بنانے کے سبب نیپال اور بھارت کے مابین بھی سرحدی ملکیت کا تنازعہ ابھر آیا ہے۔ اور بھارتی فوج کے سربراہ جنرل منوج نروانے نے پہلی بار کھل کے کہا ہے کہ نیپال چین کی شہہ پر بھارت کے لیے مسائل پیدا کر رہا ہے۔ یہ بیان دیتے وقت جنرل منوج غالباً بھول گئے کہ آج بھی لگ بھگ بتیس ہزار نیپالی گورکھے بھارتی فوج میں شامل ہیں۔ تو اگر مودی حکومت فی الحال اس قابل نہیں کہ چین کے مقابلے میں وہی مردانگی دکھا سکے جو وہ باقی پڑوسیوں پر بہانے بہانے سے جتاتی رہتی ہے تو پھر کون سا دوسرا راستہ ہے جس پر چل کر چین کو چھٹی کا نہ سہی پانچویں کا دودھ ہی یاد دلایا جا سکے۔ بھارت کا خیال ہے کہ چینی سامان کا بائیکاٹ کر کے وہ چین کو راہِ راست پر لا سکتا ہے۔ اس بھارتی نظریے میں کتنی جان ہے۔

ایک نسل در نسل کہاوت ہے ’’ دل کا راستہ معدے سے گذرتا ہے‘‘۔ یعنی مہمان نوازی دل نرم کرتی ہے اور جب دل نرم پڑ جائیں تو بڑے سے بڑا مسئلہ بھی آسانی سے حل ہو جاتا ہے۔ بھارت اور پاکستان میں کئی عشروں سے یہ نسخہ بتایا جا رہا ہے کہ پہلے تجارت کے فروغ ، چھوٹے چھوٹے سرحدی تنازعات کے نمٹاؤ اور ویزے و سفر کی سہولتیں آسان کر کے باہمی اعتماد سازی کی جائے۔ اس کے بعد کشمیر جیسے بڑے مسئلے سلجھانے کی کوشش کی جائے تو بہتر نتیجہ نکلے گا۔پاکستان نے اس نظریے کو مکمل طور پر کبھی تسلیم نہیں کیا۔ اس کا موقف ہے کہ پہلے اگر سب سے بڑے مسئلے کو سیدھا کر لیا جائے تو چھوٹے مسئلے خود بخود تیزی سے حل ہو جاتے ہیں۔ ورنہ چھوٹے مسائل بھی بڑے مسئلے کے گرد گول گول گھومتے رہتے ہیں۔ البتہ بھارت کی تھیوری یہ رہی کہ بڑے پتھر پر ہاتھ ڈالنے سے قبل اگر اردگرد بکھرے پتھر صاف ہو جائیں تو پھر بڑا پتھر اٹھاتے وقت کسی چھوٹے پتھر سے ٹھوکر نہیں لگے گی۔

پہلے اعتماد سازی اور پھر بڑے مسائل کے حل کا یہ فارمولا چین بھارت تعلقات پر بھی لاگو کرنے کی کوشش کی گئی۔ اگرچہ تجارت و اعتماد میں مسلسل اضافہ ہوا مگر ساڑھے تین ہزار کلو میٹر طویل لائن آف ایکچوئل کنٹرول کی باضابطہ حد بندی کے آثار آج بھی اتنے ہی دور ہیں جتنی چلتے گدھے کے منہ کے آگے لٹکتی ہوئی گاجر۔ انیس سو اناسی میں دونوں ممالک کے مابین سترہ سال کے وقفے سے سفارتی تعلقات بحال ہوئے۔ راجیو گاندھی نے انیس سو اٹھاسی میں چین کا دورہ کیا۔ راجیو کے بعد نرسیمہا راؤ ، اٹل بہاری واجپائی ، من موہن سنگھ بھی بیجنگ یاترا پر گئے۔ چینی وزرائے اعظم لی پنگ نے انیس سو اکیانوے میں اور وزیرِ اعظم وین جیا باؤ نے دو ہزار پانچ میں چار سو چینی سرمایہ کاروں کے ہمراہ بنگلور کا دورہ کیا۔

موجودہ چینی صدر لی پنگ دو بار بھارت آ چکے ہیں، نریندر مودی پانچ بار چین جا چکے ہیں۔ پچھلے چھ برس میں دونوں رہنماؤں کی مختلف بین الاقوامی فورمز سمیت کل ملا کے گیارہ ملاقاتیں ہو چکی ہیں۔ کبھی مودی اور لی پنگ پینگ پر بیٹھے جھول رہے ہیں ، کبھی کشتی میں سفر کر رہے ہیں ، کبھی احمد آباد کے گاندھی آشرم میں ماتھا جوڑے بیٹھے ہیں ، کبھی کیرالہ کے کھنڈرات میں چہل قدمی کر رہے ہیں، کبھی تیسری دنیا کے صنعتی ممالک کی تنظیم برکس کے اجلاس میں لنچ کر رہے ہیں ، کبھی شنگھائی تعاون کونسل میں پہلے آپ پہلے آپ کر رہے ہیں۔ چین سارک کی تنظیم میں بطور مبصر بھی شامل ہے۔ مگر اس سب کے نتیجے میں کیا بنیادی سرحدی معاملات ایک انچ بھی بہتر ہوئے یا اور ابتر ہو گئے ؟ البتہ باہمی تجارت حیران کن رفتار سے آگے بڑھتی چلی گئی۔ دو ہزار چار میں زمینی راستوں سے تجارت شروع ہوئی اور پہلے برس ہی دس ارب ڈالر کا مال بیچا اور خریدا گیا۔

آج صورت یہ ہے کہ دو طرفہ تجارت کا حجم نوے ارب ڈالر سے اوپر ہے۔ چین بھارت کا دوسرا اور بھارت چین کا دسواں بڑا اقتصادی ساجھے دار ہے۔ اگر کورونا نہ ٹوٹ پڑتا اور بھارت چین سرحدی کشیدگی کا بخار اچانک ایک سو پانچ تک نہ پہنچ جاتا تو موجودہ برس کو دونوں ممالک باہمی سفارتی تعلقات کی ستہرویں سالگرہ کے طور پر شاندار طریقے سے مناتے اور باہمی تجارت کا حجم سو ارب ڈالر کے ہدف تک پہچانے کی کوشش کرتے۔ مگر آج بھارت میں سب سے بڑا ہیش ٹیگ ہے چینی اشیا کا بائیکاٹ۔ تو جو مقصد میدانِ جنگ میں حاصل نہ کیا جا سکے وہ تجارتی بائیکاٹ کے ذریعے حاصل ہو سکتا ہے ؟ ہو بھی سکتا ہے مگر اس کیس میں شائد یہ ممکن نہ ہو۔ بھارت کو دوطرفہ تجارت میں اس وقت لگ بھگ باون ارب ڈالر کا سالانہ خسارہ ہے۔ مودی حکومت کو بھی احساس ہے لہذا اس نے سرکاری طور پر تجارت معطل کرنے کا کوئی عندیہ نہیں دیا البتہ آل انڈیا ٹریڈرز کنفیڈریشن جیسے نجی اداروں کے ذریعے چینی اشیاء کے بائیکاٹ کی مہم آگے بڑھانے کی کوشش کی ہے تاکہ عوام کا دھیان سرحدی پٹائی کی وجوہات جاننے کے بجائے قسطوں میں خریدے چینی ٹی وی توڑنے اور صدر شی پنگ کے پتلے جلانے میں لگا رہے۔

اس وقت بھارت کی پچھتر ابھرتی ہوئی ٹیکنالوجی کمپنیوں اور سروس سیکٹر میں لگ بھگ چھ ارب ڈالر کی چینی سرمایہ کاری اگر منسوخ ہوتی ہے تو بھارت کو بھاری جرمانے کا سامنا ہو سکتا ہے۔ ریلوے اور ٹیلی کمیونکیشن کے بڑے بڑے ٹھیکے بھی چینی کمپنیوں کے پاس ہیں یا ان ٹھیکوں میں شراکت ہے۔ اگر بھارت اس مرحلے پر یہ ٹھیکے منسوخ کرتا ہے تو یہ ترقیاتی منصوبے بہت پیچھے چلے جائیں گے ، ان کی لاگت بھی بڑھتی چلی جائے گی اور شائد منسوخی کا ہرجانہ بھی دینا پڑے۔ بھارت میں دوا سازی کی صنعت میں استعمال ہونے والا ستر فیصد خام مال ، شمسی توانائی کے چوراسی فیصد کل پرزے ، ہیوی انجینرنگ اور آٹو موبیل صنعت کے آدھے اجزا چین سے آتے ہیں۔ اگر باقی دنیا سے یہ اشیاء خریدی جائیں گی تو لاگت بڑھ جائے گی۔ لاگت بڑھے گی تو دنیا میں کون سستی چینی اشیا کے مقابلے میں مہنگی بھارتی اشیاء خریدے گا ؟ چلیے چینی کمپنیوں کا بائیکاٹ بھی کامیابی سے ہو جاتا ہے اور بھارت متبادل کے طور پر جاپانی، یورپی اور امریکی کمپنیاں ڈھونڈھ لیتا ہے۔ مگر تب کیا ہو گا جب معلوم ہو گا کہ یہ کمپنیاں بھی چین میں قائم اپنی فیکٹریوں سے ہی مال تیار کراتی ہیں۔

چین پر دآرو مدار کا یہ عالم ہے کہ دیوالی کے پٹاخے، ہولی کے رنگ اور پچکاریاں اور گنیش جی کی مورتیاں تک سستی پڑنے کے سبب چین سے منگوائی جاتی ہیں۔ گجرات میں سردار ولبھ بھائی پٹیل کا تین ہزار کروڑ روپے کی لاگت سے بنایا گیا کانسی کا دنیا کا سب سے بڑا مجسمہ ڈونکنگ میٹل ہینڈی کرافٹ کے چینی انجینروں کا کارنامہ ہے۔ دو ہزار سترہ میں جب دوکلام کے محاذ پر چین اور بھارت کی فوجیں تہتر روز تک آنکھوں میں آنکھیں ڈالے کھڑی رہیں تب بھی سردار پٹیل کے مجسمے پر کام ایک دن کے لیے بھی نہیں رکا اور دو ہزار اٹھارہ میں مکمل ہوا۔ چین بالی وڈ فلموں کی یورپ اور امریکا کے بعد تیسری بڑی منڈی ہے اور اس منڈی سے بالی وڈ کو لگ بھگ پانچ ارب ڈالر کا ریونیو ملتا ہے۔ چونکہ اوپر کی سطح پر کسی کو ادراک نہیں کہ اتنی بڑی تجارت کا پہیہ اچانک سے روکنے کے قومی نقصانات کیا ہو سکتے ہیں۔ لہذا جس کے منہ میں جو آ رہا ہے اگل رہا ہے۔جیسے ایک مرکزی وزیر رام داس اتاولے نے کہا کہ دیش کی جنتا چائنیز کھانا چھوڑ دے اور چائنیز ریسٹورنٹس کا بائیکاٹ کر دے۔

اتاولے جی اس قدر اتاولے ہیں کہ کوئی انھیں سمجھا بھی نہیں سکتا کہ حضور چینی کھانے چین سے بن کے نہیں آتے بلکہ ان کھانوں میں جتنے بھی اجزا شامل ہوتے ہیں وہ سویا ساس وغیرہ کو چھوڑ کر نوے فیصد ہندوستانی ہی ہوتے ہیں، یہ کھانے لاکھوں ہندوستانی سڑک پر بیچتے ہیں اور کروڑوں لوگ سڑک پر ہی کھاتے ہیں۔ لہذا چینی کھانوں کے بائیکاٹ سے چین کا توکچھ بھی نہیں بگڑے گا۔اس کی چوٹ براہِ راست عام بھارتیوں کے پیٹ پر ہی پڑے گی۔ رام داس اتاولے جیسے ہی ایک صاحب دلی میں رہتے تھے مگر مسلسل چوبیس گھنٹے ریڈیو پاکستان سنتے تھے۔ کسی نے پوچھا ججمان جی کبھی آل انڈیا ریڈیو بھی سن لیا کرو۔ ججمان جی نے کہا میاں ریڈیو پاکستان میں اپنے شوق کے لیے تھوڑی بلکہ دشمن کی بجلی ضایع کرنے کے لیے سنتا ہوں۔ ( تمت بالخیر)

وسعت اللہ خان 

بشکریہ ایکسپریس نیوز