پاکستان میں مہنگائی سے ریلیف کیسے حاصل ہو ؟

معاشی بحران کے حوالے سے پاکستان کئی طرح کی مشکلات کا شکار ہے جن پر قابو پانے کی کوششیں کی جا رہی ہیں مگر ایک مسئلہ جس کی وجہ سے عام لوگ سب سے زیادہ پریشان ہیں بلاشبہ روز مرہ استعمال کی ضروری اشیا کی گرانی ہے۔ آٹے اور چینی کی قیمتوں میں حالیہ اضافے نے انہیں مزید بےحال کر دیا ہے۔ اس سنگین صورتحال کا سب سے زیادہ ادراک خود وزیراعظم عمران خان کو ہے اور سب سے زیادہ فکر مند بھی وہی دکھائی دیتے ہیں۔ اس کا اظہار اُن درد مندانہ اقدامات سے ہوتا ہے جو ان کی حکومت مہنگائی کو کنٹرول کرنے اور نادار طبقے کو ریلیف دینے کے لئے کر رہی ہے۔ ان کی ہدایت پر وفاقی حکومت نے عوام کو سستی اشیا اور روزگار مہیا کرنے کا ایک جامع منصوبہ بنایا ہے جس کی ماضی میں کوئی مثال نہیں ملتی۔ 

منصوبے کے تحت ملک بھر میں 50 ہزار ریٹیل اسٹورز یا پرچون کی دکانیں کھولی جائیں گی۔ اس مقصد کے لئے دکانیں کھولنے کے خواہشمند شہریوں کو 5 لاکھ روپے تک قرض فراہم کیا جائے گا۔ ڈیڑھ ہزار اسٹور فوری طور پر کھولے جارہے ہیں جن میں 60 فیصد اشیائے خور ونوش یوٹیلٹی اسٹورز کارپوریشن مہیا کرے گی جبکہ 40 فیصد اشیا دکان مالکان خود اوپن مارکیٹ سے خریدیں گے۔ اس اسکیم سے 50 ہزار خاندانوں کو براہِ راست روزگار بھی ملے گا۔ غربا کے لئے راشن کارڈز کا اجرا بھی منصوبے کا حصہ ہے یوٹیلٹی اسٹورز پر اشیائے خورو نوش کی قیمتوں میں کمی کے لئے اربوں روپے کا ایک اور پیکیج بھی دیا جا رہا ہے۔ 

وزیراعظم نے یوٹیلٹی اسٹورز کو 7 ارب روپے کا ریلیف پیکیج رمضان المبارک تک جاری رکھنے کا بھی حکم دیا ہے۔ حکومت آج عوام کے لئے بنیادی غذائی اجناس کی قیمتوں میں کمی کی خاطر مختلف اقدامات اور سہولتوں کا بھی اعلان کرے گی جن کی منظوری کے لئے اقتصادی رابطہ کمیٹی کا ہنگامی اجلاس بلایا گیا۔ وفاقی کابینہ کی توثیق کے بعد ان پر فوری عملدرآمد شروع ہو جائے گا۔ توقع ہے کہ ان ہنگامی اقدامات کے نتیجے میں مہنگائی پر بڑی حد تک قابو پانے اور غریب طبقے کی مشکلات کم کرنے میں مدد ملے گی۔ اس حوالے سے وزیر اعظم کا سماجی رابطے کی ویب سائٹ پر بیان قابلِ ستائش ہے جس میں انہوں نے اس عزم کا اظہار کیا ہے کہ چاہے کچھ بھی ہو جائے، وہ قیمتوں میں کمی ضرور لائیں گے کیونکہ انہیں ان مشکلات کا ادراک ہے جن کا تنخواہ دار طبقے سمیت مجموعی طورپر عوام کو سامنا ہے۔

انہوں نے مہنگائی کے ذمہ دار مافیاز اور ذخیرہ اندوزوں کے خلاف بھرپور کارروائی اور انہیں کڑی سزائیں دینے کا اعلان کیا جس کا عوامی سطح پر خیر مقدم کیا جائے گا۔ حکومتی شخصیات کا دعویٰ ہے کہ مہنگائی کی ذمہ دار سابقہ حکومتیں اور انکی ناقص پالیسیاں ہیں۔ مناسب ہو گا کہ اس معاملے میں موجودہ حکومت خود اپنی پالیسیوں، فیصلوں اور اقدامات خاص طور پر آئی ایم ایف کے کردار کا بھی بغور جائزہ لے جس کے قرضوں کی شرائط، ٹیکسوں پر اصرار اور ریونیو اہداف کا بوجھ ہماری معیشت برداشت کرنے کی سکت نہیں رکھتی جس کا لازمی نتیجہ بالآخر عوام کے لئے گرانی سمیت نت نئی مالی مشکلات کی صورت میں سامنے آتا ہے۔ 

ان دنوں آئی ایم ایف کا مشن دس روزہ دورے پر پاکستان آیا ہوا ہے تکنیکی سطح کے مذاکرات مکمل ہونے کے بعد اب پالیسی مذاکرات شروع ہو گئے ہیں اور اطلاع یہ ہے کہ عالمی مالیاتی فنڈ دو سو ارب روپے کے نئے ٹیکسوں اور بجلی و گیس کے نرخوں میں اضافے کا خواہش مند ہے گویا نئے معاشی اہداف کو حتمی شکل دی جائے گی۔ ہماری معاشی ٹیم کو مذاکرات میں ملک میں بڑھتی ہوئی مہنگائی کو ملحوظ رکھنا ہو گا جس کی وجہ سے پہلے ہی حکومت کی ساکھ دائو پر لگی ہوئی ہے۔ توقع کی جانی چاہئے کہ ایسا کوئی فیصلہ نہیں کیا جائے گا جس کے عوام پر منفی اثرات مرتب ہوں۔

بشکریہ روزنامہ جنگ