پاکستان اسلام کے نام پر بنا اور اس کے نام پر ہی قائم رہے گا : جنرل بلال اکبر، ڈی جی رینجرز

’’پاکستان اسلام کے نام پر بنا اور اس کے نام پر ہی قائم رہے گا‘‘: جنرل بلال اکبر، ڈی جی رینجرز

’’تیس سال سے قرآن کی تلاوت اور تفسیر کا مطالعہ کبھی ترک نہیں کیا‘‘

’’سندھ کے بارڈر پر ڈیوٹی کے دوران بخاری اور مشکوة تفصیل سے پڑھیں‘‘

کراچی میں ختم بخاری کی تقریب سے خطاب

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ڈی جی رینجرز جنرل بلال اکبر نے کہاہے کہ پاکستان اسلام کے نام پر بنا اور اس کے نام پر ہی قائم رہے گا۔

جامعۃالعلوم الاسلامیہ کے ختم بخاری کے پروگرام سے خطاب کرتے ہوئے انھوں نے کہا کہ پاکستان اسلام کے نام پر بنا ہے اور اسلام کے نام پر ہی قائم رہے گا،پاکستان کے تمام طبقات آپس میں بھائی بھائی ہیں انھیں مل جل کر رھنا ہوگا،قرآن کریم کی وجہ سے صحابہ کرام اور تمام مسلمانوں کو عزت ملی آج بھی مسلمان قرآن سے وابستہ ہو کرعزت یافتہ ہو سکتے ہیں۔

 انھوں نے کہا کہ میرا دینی مدارس اور علماء سے پرانا تعلق ہے، میرے والد جامعہ اشرفیہ سے فیض یافتہ تھے، انھوں نے کہا کہ نوجوان فضلاء ہر کام تسلسل سے کریں۔ روزانہ قرآن وحدیث کی تلاوت کا معمول بنائیں،میں نے ترجمہ قرآن سیاچن کے محاذ پر پڑھا اور تیس سال سے قرآن کی تلاوت اور تفسیر کا مطالعہ کبھی ترک نہیں کیا،قرآن کا مطالعہ نظم وضبط سکھاتا ہے،میں نے سندھ کے بارڈر پر ڈیوٹی کے دوران بخاری اور مشکوة تفصیل سے پڑھیں۔ انھوں‌ نے کہا کہ نوجوان علماء دین کی تبلیغ میں نرمی والا اندازاختیار کریں،حدیث شریف میں ہے کہ جو نرمی سے محروم کردیا گیا وہ تمام بھلائیوں سے محروم کردیا گیا ۔ لہذا تبلیغ میں نرمی ہو جس کے اثرات زیادہ ہوں گے،میں دین کا طالبعلم ہوں اور تاحیات دین کا طالب علم رھنا چاھتا ہوں۔

(رپورٹ: رضوان ملک)