انڈونیشیا میں آتش فشاں ماؤنٹ سنابنگ پھر جاگ اٹھا

انڈونیشیا میں آتش فشاں متحرک ہونے کے بعد اس کے قریب رہنے والے ہزاروں افراد کو فوراً گھروں کو چھوڑنے کا کہا گیا ہے۔

سوماترا جزیرے پر موجود ماؤنٹ سنابنگ نامی آتش فشاں سنہ 2010 میں دوبارہ حرکت میں آگیا تھا لیکن دو جون سے اس کی حرکت میں شدت دیکھی گئی ہے۔

سنہ 2010 سے قبل یہ آتش فشاں 400 سال سے زیادہ عرصے سے متحرک نہیں تھا۔

اس آتش فشاں کے قریب رہنے والے تقریباً تین ہزار لوگوں کو وہاں سے جانے کا کہا گیا ہے جن میں سے پیر کو جانے والے افراد کی تعداد 1200 ہے۔

سائنسدانوں کو تشویش ہے کہ آئندہ ہفتوں میں یہ آتش فشاں زیادہ خطرناک ہو سکتا ہے۔

پیر کے روز اس آتش فشاں سے گرم راکھ کے کم از کم 28 مختلف بہاؤ دیکھے گئے جو تیزی کے ساتھ پہاڑ سے نیچے کی طرف آئے۔

انڈونیشیا کے سائنسدان گیدی سوانتیکا کا کہنا ہے کہ ’ماؤنٹ سنابنگ پر ابلتے ہوئے لاوے کی علامات دیکھی گئیں ہیں۔

آتش فشاں پہاڑ کے اوپر بننے والے سوراخ کے قریب لاوا دکھائی دے رہا ہے جس کے بارے میں خیال کیا جا رہا ہے کہ وہ انتہائی تیزی کے ساتھ نیچے کی طرف آئے گا۔

ایک فوجی کمانڈر نے خبر رساں ادارے اے ایف پی کو بتایا ہے کہ دو جون کو آتش فشاں کی حرکت میں شدت دیکھنے کے بعد اسی وقت ریڈ الرٹ جاری کر دیا گیا تھا۔ انھوں نے بتایا کہ آئندہ دنوں میں ہزاروں مزید افراد کو علاقہ خالی کرنا پڑ سکتا ہے۔

گذشتہ سال ماؤنٹ سنابنگ کے پھٹنے کے نتیجے میں گرنے والے پتھروں سے تقریباً 14 افراد ہلاک ہو گئے تھے۔